Դատապարտյալներին ծանրոցներ փոխանցնելու առցանց ծառայությունը կոռուպցիայից խուսափելու քայլ է

Դատապարտյալներին ծանրոցներ փոխանցնելու համար նոր ծառայություն է ստեղծվել: Այսուհետ դատապարտյալների և կալանավորների հարազատները կարող են առցանց պատվիրել և հանձնուքներ ու ծանրոցներ փոխանցել  նրանց: Ի՞նչ հնարավորություններ ունի ծառայությունը և թե ի՞նչ փոփոխություններ են նրանում կատարվում՝ պարզել է Իրավաբան.netը: 

2016 թվականի մարտի 11-ից ՀՀ ԱՆ «Արմավիր» քրեակատարողական հիմնարկում արդեն իսկ շունչ ստացած այս նախագիծը կգործի նաև ՀՀ ԱՆ «Արթիկ» ՔԿՀ-ում պահվող կալանավորված անձանց և դատապարտյալների համար:

ՔԿՀ տեղեկատվության և հասարակայնության հետ կապերի վարչության պետ Գոռ Ղլեչյանը  Իրավաբան.netի հետ զրույցում նշեց, որ առցանց պատվերները կթեթևացնեն մարդկանց հերթը:  «Ծրագրի նպատակն է զերծ մնալ կոռուպցիոն ռիսկերից, ինչպես նաև խնայել դատապարտյալների հարազատների ժամանակն ու գումարը, որը կորցնում են ՔԿՀ-ներ հասնելու և փաթեթները փոխանցելու հերթերի մեջ»,-ընդգծեց Ղլեչյանը:

Առցանց պատվերներ կատարվում են  www.ced.am  կայքէջից:

Խանութից ընտրվում է անհրաժեշտ ապրանքատեսակը, նշվում վերջնական քանակը և սեղմում «Ուղարկել հարցումը» կոճակը։ Բացված պատուհանում լրացրվում է պատվիրատուի և ստացողի տվյալները։ Այնուհետև հիմնադրամը ՔԿՀ ղեկավարի և ստացողի համաձայնությունը ստանալուց հետո էլ. փաստով ուղարկում է վճարման կոդը։ Վճարում կատարվում է բանկային քարտով։

Վճարումից հետո առավելագույնը մեկ աշխատանքային օրվա ընթացքում պատվիրած ապրանքները փոխանցվում են ստացողին:

Ինչպես հաստատեցին Գոռ Ղլեչյանը և «Աջակցություն դատապարտյալին» հիմնադրամի գլխավոր տնօրեն Ռոբերտ Բուդաղյանը, ծառայությունը կատարվում է լրիվ անվճար: Այսինքն առցանց պատվերների համար հավելավճար չի կատարվում:

Ռոբերտ Բուդաղյանի հետ զրույցում պարզ դարձավ, որ չնայած այս պայմաններին՝ պատվերները շատ քիչ են: «Այսքան ժամանակ եղել է 5-6 պատվեր, մոտ 100.000 դամի չափով: Քիչ են օգտվում առցանց խանութից»,-նշեց հիմնադրամի տնօրենը:

Այն հարցին, թե որտեղի՞ց է ձեռք բերվում պատվիրված ապրանքը, Բուդաղյանը պատասխանեց, թե այնտեղից, որտեղից որ բոլորն են գնում: Մանրամասնելով՝ նա նշեց,-«Քրեակատարողական հիմնարկների մոտ մենք խանութներ ունենք, որոնք սովորական ձևով աշխատում են: Պատվերի դեպքում էլ հենց այդ խանութներից ենք գնումներն անում»:

Կաթնամթերքի բաժինը մյուս ապրանքատեսակների համեմատ շատ աղքատիկ էր, ուստի հետաքրքրվեցինք, թե ինչու՞ է միայն «Մարիանա» ապրանքանիշի արտադրանքը ներկայացված, Ռ.Բուդաղյանը հայտնեց, որ պատճառը զուտ ֆինանսական է, և քանի որ գնորդներ շատ չեն լինում, և պահանջարկն այդքան էլ մեծ չէ, սակավաթիվ ընկերությունների հետ են աշխատում:

image-13-copy

Արձանագրենք նաև, որ կային որոշ ապրանքատեսակներ, որոնք սովորական խանութների համեմատ ավելի թանկ էին, օրինակ 3*1լուծվող սուրճ «Royal Armenia»-ն արժեր 110 դրամ, այնինչ խանութներում վաճառվում է 60-70 դրամով:

«Մենք գների վերանայում ենք անում, եթե դուք էլ նկատել եք, ասեք, դրանք անպայման կշտկվեն»,- հայտնեց «Աջակցություն դատապարտյալին» հիմնադրամի գլխավոր տնօրենը:

Ընդգծենք, որ մոտ ժամեր անց որոշ ապրանքատեսակների գներ իսկապես փոխվեցին, և վերոնշյալ սուրճն արդեն 60 դրամ արժեր, մի քանի այլ ապրանքների գներ ևս նվազել էին 10-20 դրամով: image-12-copyԱյս թվում՝ «Royal Armenia» սև սուրճը 410 դրամից նվացել էր 360 դրամի, «Nescafe» 3*1 լուծվող սուրճը՝ 90 դրամից դարձել էր 80դր., Կոզինախ քաղցրավենքիքը՝ 190 դրամից՝ 180 դրամ, «Dirol» մաստակները՝ 170-ից 150 դրամ, մեկ այլ տեսակը՝ 200-դրամից 170 դրամ, իսկ կաթնամթերիքի բաժնից «Մարիաննա» 400գր թթվասերը 540-ից նվազել էր 510 դրամի, մածունը՝ 325դրամից՝ 300 դրամ:

image-9-copy

Ալիսա Չիլինգարյան 

Իրավաբան.net

Լուրեր

Իրադարձություններ