Ապրիլի 27-ին ՀՀ վճռաբեկ դատարանի նախագահ Արման Մկրտումյանն ընդունել է Հայաստանի Հանրապետությունում Չինաստանի Ժողովրդական Հանրապետության արտակարգ և լիազոր դեսպան Թիան Էրլունին:
Դեսպան Էրլունը շնորհակալություն է հայտնել ՀՀ վճռաբեկ դատարանի նախագահին ընդունելության համար և ընդգծել, որ վերջին տարիներին Հայաստանի և Չինաստանի դատական համակարգերի հարաբերությունները զգալիորեն ակտիվացել են և մտել որակական նոր փուլ:
Հանդիպման ընթացքում ՀՀ վճռաբեկ դատարանի նախագահը և դեսպանը քննարկել են Հայաստանի և Չինաստանի դատական համակարգերի առանձնահատկությունների, տարբեր ատյանների դատարանների լիազորությունների, դատավորների մասնագիտացման, դատարանների ծանրաբեռնվածության, դատարանների նկատմամբ վստահության, ինչպես նաև վեճերի այլընտրանքային լուծման կառուցակարգերի հետ կապված մի շարք հարցեր:
Թիան Էրլունը ՀՀ վճռաբեկ դատարանի նախագահի ուղեկցությամբ շրջել է ՀՀ վճռաբեկ դատարանի «Կարմիր» և «Սպիտակ» դահլիճներում, «Մխիթար Գոշ» գրադարանում, ծանոթացել ՀՀ վճռաբեկ դատարանի պատմությանը:
Հանդիպման ավարտին կողմերը փոխգործակցությունը խորացնելու պատրաստակամություն են հայտնել:
Այս մասին Իրավաբան.net-ը տեղեկանում է Դատական դեպարտամենտից:
