Արարատի բնապահպանական տեղեկատվական «Օրհուս» կենտրոնում դեկտեմբերի 17-ին կայացավ հանդիպում քննարկում ՔՀԿ-ների հակակոռուպցիոն կոալիցիայի Արարատի մարզի ՔՀԿ-ների խմբի և Արարատի մարզի ոստիկանության ներկայացուցիչների հետ:
Քննարկման ընթացքում ողջույնի խոսքով հանդես եկավ «Կոռուպցիայի դեմ պայքարի բազմակողմանի խթանում» ծրագրի Արարատի մարզի ռեգիոնալ համակարգող Տիգրան Մաթևոսյանը: Արարատի ոստիկանական բաժանմունքի պետ Գագիկ Հակոբյանը ողջունեց ներկաներին և ներկայացրեց ոստիկանության կողմից կատարված և կատարվող բարեփոխումները՝ քաղաքացիներին մատուցվող ծառայությունների մասով: Այնուհետև ողջույնի խոսքով հանդես եկավ ՀՀ ՃՈ 2-րդ գումարտակի 1-ին վաշտի 2-րդ դասակի ավագ տեսուչ Շավարշ Արամյանը, ով ներկայացրեց ՃՈ ոլորտում կատարված աշխատանքները:
Մասնակիցներից Արարատի 2-րդ դպրոցի տնօրեն Զ. Հովհաննիսյանը առաջարկեց ոստիկանության ներկայացուցիչներին առավել ուշադրություն դարձնել անչափահասներին և ավելի հաճախ հանդիպում-քննարկումներ կազմակերպել նրանց հետ:
«Միասին» ՀԿ նախագահ Տիգրան Շիրինյանը հետաքրքրվեց, թե արդյո՞ք հաշմանդամություն ունեցող և սայլակներից օգտվող անձիք կունենան հնարավորություն ազատորեն օգտվել համապատասխան ծառայություններից ոստիկանության Անձնագրային և վիզաների վարչության տարածքային բաժանմունքներում:
Արարատի ոստիկանապետը կարևորեց քննարկումը՝ հույս հայտնելով, որ ՔՀԿ-Ոստիկանություն համատեղ աշխատանքի արդյունքում հնարավոր կլինի վեր հանել կոռուպցիոն երևույթները ոստիկանության ոլորտում՝ քաղաքացիներին ծառայությունների մատուցման մասով ու փոփոխություններով հասնել ցանկալի և դրական արդյունքի:
