Կառավարության՝ նոյեմբերի 26-ի նիստում ընդգրկված են զինվորական ծառայությունից տարկետում տալու և ազատելու վերաբերյալ երեք նախագծեր:
Դրանցից մեկով Ռուբեն Մուրադյանը, ով հայ ժամանակակից բալետի երիտասարդ արտիստներից է, 2015-2016 թթ. պետք է ելույթ ունենա Ալ. Սպենդիարյանի անվան օպերայի և բալետի ազգային ակադեմիական թատրոնի բալետային խմբի մի շարք հյուրախաղերում` մասնավորապես Ռուսաստանի Դաշնությունում, Իտալիայում, Ֆրանսիայում, Վրաստանում և այլ երկրներում: Նախատեսվում են նաև ելույթներ Հայաստանում:
Կառավարության նախագծում կարդում ենք, որ հաշվի առնելով Ռ. Մուրադյանի մեծ ներդրումը հայ բալետային արվեստում, նրա խոստումնալից ապագան, հայ բալետը Հայաստանում և արտերկրում ըստ արժանվույն ներկայացնելու գործունեությունը, առաջարկվում է Ռուբեն Մուրադյանին ազատել պարտադիր զինվորական ծառայությունից:
Հաջորդ նախագծով առաջարկվում է ծառայությունից ազատել Հիրաչ Յագանին, Լևոն Աիրապետյանին, Վարանթ Բեզդիկյանին և Սերգիյ Օգանեսյանին:
Նշվում է, որ նրանք հանդես են գալիս ֆուտբոլի Հայաստանի Հանրապետության հավաքական թիմում, պետք է մասնակցեն ֆուտբոլի 2016 թվականի Եվրոպայի առաջնության նախընտրական փուլերին:
Ֆուտբոլային խաղերին մասնակցելու հիմքով մեկ այլ նախագծով պարտադիր զինվորական ծառայության զորակոչից տարկետում կտրվի Արաս Օզբիլիզին, Արտակ Ալեկսանյանին, Սևակ Ագրամանյանին, Արտյոմ Սիմոնյանին, Մարտին Գևորկյանին և Սերոբ Գրիգորյանին:
