2015 թվականի նոյեմբերի 23-ին ՔՀԿ-ների հակակոռուպցիոն կոալիցիայի Լոռու մարզի ՔՀԿ-ների խումբը «Կոռուպցիայի դեմ պայքարի բազմակողմանի խթանում» ծրագրի շրջանակներում «Հայաստանի երիտասարդ իրավաբանների ասոցիացիա» հասարակական կազմակերպության Լոռու մարզային մասնաճյուղի գրասենյակում  կազմակերպեց կլոր սեղան-քննարկում «Ներքաղաքային ուղևորափոխադրումների ոլորտում առկա կոռուպցիոն ռիսկերը» թեմայով:

Քննարկմանը ներկա էր Վանաձորի քաղաքապետարանի առևտրի և սպասարկման, տրանսպորտը համակարգող բաժնի պետ Էռնեստ Գևորգյանը, ներկայացուցիչներ քաղաքացիական հասարակական կազմակերպություններից, փաստաբանական գրասենյակներից:

Քննարկման ընթացքում ՔՀԿ-ների հակակոռուպցիոն կոալիցիայի Լոռու մարզի ՔՀԿ-ների խմբի անդամները հանդես եկան ոլորտին վերաբերվող զեկույցներով, ինչից հետո ներկաների միջև ծավալվեցին քննարկումներ: Քաղաքացիական հասարակության ներկայացուցիչները ներկայացրեցին ոլորտում առկա խնդիրները, իրենց հետաքրքրող հարցերը, առաջարկեցին խնդիրների լուծման տարբերակներ:

Քննարկման ավարտին քաղաքացիական հասարակության կազմակերպությունների ներկայացուցիչները և Վանաձորի քաղաքապետարանի առևտրի և սպասարկման, տրանսպորտը համակարգող բաժնի պետ Էռնեստ Գևորգյանը պայմանավորվածություն ձեռք բերեցին այն մասին, որ Վանաձոր քաղաքում առաջիկայում կայանալիք` ուղևորների կանոնավոր փոխադրումներն իրականացնող կազմակերպությունների ընտրության մրցույթի արդյունքում կնքվող պայմանագրերի նախագիծը կքննարկվի նաև քաղաքացիական հասարակության կազմակերպությունների ներկայացուցիչների հետ:

Իրավաբան.net