Մատուցողի Մարիամ Հունանյանի սպանության գործի հերթական նիստն անցնում էր թեժ մթնոլորտում:

Դատարանը հետազոտում էր նախաքննության ընթացքում կազմված արձանագրությունները և փորձաքննությունները: Գրեթե բոլոր արձանագրություններից հետո պաշտպանական կողմը հայտարարությամբ էր հանդես գալիս` նշելով, որ դրանք իրականացվել են քրեադատավարական նորմերի խախտմամբ:

Դատական նիստի ընթացքում հրապարակվեցին նաև Մարիամ Հունանյանի դիակի դատաբժշշկական փորձաքննության արդյունքները, տուժողի մայրն ի վիճակի չէր ներկա գտնվել նիստին, սկզբում մեղադրողը առաջարկեց դատարանին թույլ տալ նրան չմասնակցել նիստին, կինը դուրս չեկավ, ավելի ուշ ստիպված եղավ լքել նիստերի դահլիճը՝ արցունքն աչքերին:

Ամեն ինչ սկսվեց դեպքի վայրում տեսագրության ուսումնասիրությունից: Դատարանի մասնակիցները դիտեցին մի տեսագրություն, որտեղ ամբաստանյալ Դավիթ Թամրազյանը պատմում էր, թե ինչպես է սպանել տուժողին` Մարիամ Հունանյանին:

Այս տեսագրությունն ուսումնասիրելուց հետո ամբաստանյալի փաստաբան Կրոմվել Գրիգորյանը առարկեց, նա ասաց, որ հետագայում միջնորդությամբ է հանդես գալու այս ապացույցը որպես անթույլատրելի ճանաչելու համար. «Մենք դատարանում դիտեցին շուրջ երեք րոպե տևողությամբ մի տեսանյութ, իսկ քննչական գործողությունները տևել են 1 ժամ 45 րոպե, ժամկետը չի պահպանվել»,- նշեց փաստաբանը, իսկ մեղադրողը առարկեց` ասելով, որ արձանագրության մեջ չկա պնդում, թե նկարահանումը պետք է իրականացվի սկզբից մինչև վերջ:

Մեղադրողը վերսկսեց արձանագրությունների ընթերցումը,  պաշտպանը նրան ընդհատում էր` խնդրելով հստակ կարդալ և բաց չթողնել տողերը, արձանագրություններից հետո նա հայտարարում էր, որ միջնորդությամբ է հանդես գալու դրանք որպես անթույլատրելի ապացույց ճանաչելու վերաբերյալ:

Օրինակ` փաստաբանը անդրադառնալով հանցագործության գործիքի` դանակի` Դավիթ Թամրազյանի կողմից ճանաչման արձանագրությանը` նշեց. «Խուզարկությամբ հայտնաբերվել են դանակներ, որևէ արտահայտություն չկա, թե խուզարկության արձանագրության որ դանակին է վերաբերում, չկա արտաքին բնութագիր, չկա նշված գրառում, թե կոնկրետ դանակը որ տեղում է դրվել, ընդամենը նշված է, որ առգրավված դանակը դրեց չորրոդ համարի տակ, մենք ի՞նչ իմանանք, թե քննիչն ինչ հաշվարկ է կատարել` ձախից, թե աջից: Այնպես որ` հետևություն անել, որ Դավիթ Թամրազյանը ճանաչել է իր տանից առգրավված դանակը, չի կարող իրական լինել»,- նշեց փաստաբանը:

Մեղադրողի և պաշտպանի միջև վիճաբանություն եղավ արձանագրություններից մեկի ընթերցման ժամանակ, երբ առկա էր ընթերականերից մեկի անունը: Կրոմվել Գրիգորյանը մեղադրողին խնդրեց հստակ կարդալ ազգանունը, սա հունից հանեց դատախազին, իսկ դատավորը հորդորեց փաստաբանին տեղից չխոսել, փաստաբանը հայտարարությամբ հանդես եկավ` ասելով. «Ես խնդրեցի հստակ ընթերցել ազգանունը, կարծում եմ` այս հանգամանքը ուշադիր չի ուսումնասիրել նաև նախագահողը. ընթերականերից մեկի ազգանունը արձանագրություններից մեկում նշված է Դիլանյան, իսկ մեկ այլ տեղ Գիլքանյան, մինչդեռ խոսքը գնում է նույն անձի վերաբերյալ: Պաշտպանության կողմը նույնպես միջնորդելու է, որ դատարանն այս ապացույցն ընդունի որպես անթույլատրելի ապացույց»,- նշեց պարոն Գրիգորյանը:

Բացի այդ, նա նկատեց, որ մեղադրողը տողեր է բաց թողնում. «Հարգելի մեղադրող տողեր եք բաց թողնում»,- նկատողություն արեց, ինչն էլ դուր չեկավ դատավոր Տաթևիկ Գրիգորյանին, վերջինս փաստաբանին արգելեց տեղից խոսել, առաջարկեց գրառումներ անել, երբ մեղադրողն ավարտի, կարող է հայտարարությամբ հանդես գալ և ներկայացնել առարկությունները:

Գ.Թ.

Իրավաբան.net