Այսօր Կենտրոն և Նորք Մարաշ վարչական շրջանների ընդհանուր իրավասության դատարանում շարունակվեց տատի սպանության մեջ մեղադրվող 24-ամյա Ալբերտ Մոմջյանի գործով դատավարությունը:
Նիստի սկզբում նախագահող դատավորը հայտարարեց, որ իրեղեն ապացույցները ամբողջությամբ չէին ստուգվել, որովհետև պետք է հետազոտվեին նաև զարդերը:
Զարդերի փաթեթը հետազոտելուց հետո խոսքը տրվեց ամբաստանյալին: Ալբերտ Մոմջյանը իրեն մեղավոր ճանաչեց մասնակի. «Գողություն չեմ արել, սպանությունն էլ ստացվել է»: Նա պատմեց, որ մինչև դեպքի տեղի ունենալը, տատի հետ զրույց է ունեցել և նրան պատմել է իր մտատանջությունների մասին: Տատը հասկացել է, որ խոսքը պարտքերի մասին է և հարցրել է. «Էլի խաղում ե՞ս»: Զրույցից հետո նա խոստացել է օգնել և ոսկեղենը տվել է, որպեսզի Ալբերտը գրավ դնի: Դրանից հետո տատը «Վիվառո» բուքմեյքերական ընկերության թղթեր է գտել թոռան մոտ և հասկացել, որ նա շարունակում է խաղալ: Նորից պարտքերի մեջ լինելով՝ Ալբերտը տատի տված ոսկեղենը, որն արդեն իսկ գրավ է դրված եղել, հանել է և փոխել քարերը:
Դեպքի օրը տատը զանգահարել է Ալբերտին և ասել է՝ գա Ձորաղբյուրի իրենց ամառանոց, որպեսզի մեքենան սարքի: Ձորաղբյուրում տանը եղած ժամանակ նրանք սկսել են վիճել, Ալբերտը ցանկացել է գնալ, տատը քաշքշել, ճանկռել է իր հագուստները և ցանկացել է մեքենայի բանալիները վերցնել: Ինքը ուժեղ հրել է, տատն ընկել է: Ալբերտը մոտեցել է տատին, տեսել է, որ ականջից արյուն է գալիս և հասկացել է, որ մահացել է:
«Որոշեցի մարմինը մի տեղ թողեմ, ես էլ կորչեմ»,- ասաց Ալբերտը ու հավելեց, թե : Կատարվածի մասին ցանակացել է հորը պատմել, բայց վախեցել է:
Իսկ հայրը երբ արդեն հասկացել է, որ մորը սպանողը որդին է, ասել է, որ բոլոր ապացույցները որդու դեմ են . «Գոնե մորս տեղը ասա, մերս առանց գերեզման չմնա»:
Ամբաստանյալի խոսքից հետո նրան հարցաքննեց դատախազը: Այն հարցին, թե ինչպես է 9-րդ հարկից միայնակ իջեցրել 70 կգ կնոջը, Ալբերտ Մոմջյանը պատասխանեց. «Վերելակով եմ իջեցրել ու տարել պահել»: Իսկ իր վրա եղած այտուցների հանգամանքը բացատրեց, որ բարկությունից պատերին է խփել ու ձեռքերը վնասել է:
Դատավորի այն դիտարկմանը, որ ամբաստանյալի ցուցմունքի և հոր ցուցմունքի միջև կան հակասություններ, ամբաստանյալը ասաց, որ պատճառն այն է, որ հայրն ուզում է իր վիճակն ավելի ծանրացնել:
Այն, որ տատի մահն արձանագրվել է շնչառական օրգանները սեղմելու հետևանքով, իսկ, ամբաստանյալի պատմածով, ծոծրակին է հարվածել, Ալբերտը պարզաբանեց, որ գուցե տատը այդ վնասվածքը ստացել է մեքենայի մեջ:
Հարցաքննությունից հետո պաշտպանը միջնորդություն ներկայացրեց՝ անցկացնելու դատահոգեբուժական-դատահոգեբանական համալիր փորձաքննություն, սակայն դատարանը մերժեց միջնորդությունը՝ այն համարելով անհիմն:
Պաշտպանի հաջորդ միջնորդությունը՝ վերացնելու տեսակցության արգելքը, դատարանը բավարարեց:
Մեղադրող կողմին ճառի պատրաստվելու համար տրամադրվեց ժամանակ. հաջորդ դատական նիստը տեղի կունենա նոյեմբերի 9-ին:
Զառա Մանուչարյան
