Ինչպես հայտնել էինք, երեկ Ազգային ժողովի շենքի մոտ բախումներ էին եղել սահմանադրական փոփոխությունների դեմ պայքարող «Ոչ» քաղաքական, քաղաքացիական ճակատի մասնակիցների և ոստիկանների միջև: Բերման էր ենթարկվել 21 անձ: Նրանց մեջ է եղել նաև փաստաբան Տիգրան Եգորյանը և «Իրավունքի Եվրոպա Միավորում» ՀԿ իրավաբաններ Սերգեյ Գրիգորյանն ու Արսեն Շահբազյանը:
Իրավաբան.net-ի հետ զրույցում Տիգրան Եգորյանն ասաց, որ շուրջ 1-1.5 ժամ իրենց ոստիկանության բաժանմունքում պահելուց հետո ոստիկանության ազատ են թողել: Արաբկիրի բաժնի պետն ու ոստիկանության Երևան քաղաքի վարչության պետի տեղակալ Իսկանդարյանը նրանց հայտնել են, թե սխալ է տեղի ունեցել:
«Մենք հարցրեցինք, թե ինչու գրավոր չեք արձանագրում այս ամենը, ասացին՝ կարիքը չկա: Մենք էլ ասացինք, որ այս ամենն անհետևանք չենք թողնելու»,- փաստաբանն իր խոսքում ընդգծում է, որ իրենց բաց թողնելու ժամանակ Երևանի վարչության պետի տեղակալ ներկայացած Իսկանդարյանն ասել է, թե «հիմա ձեզ ազատ ենք արձակում, բայց խնդրում ենք՝ հավաքներին մի մասնակցեք»:
Ինչ վերաբերում է երեկվա դեպքերին, Տիգրան Եգորյանն ասաց, որ ոստիկաններն իմացել են, որ ինքը փաստաբան է և բերման են ենթարկել. երբ Սերգեյ Գրիգորյանին բերման ենթարկելիս են եղել, նա հայտնել է, որ ինքը փաստաբան է և մասնագիտական աջակցություն պետք է ցույց տա նրան, և դրանից 20 րոպե հետո իրեն նույնպես բերման են ենթարկել:
