Իտալահայ բիզնեսմեն և կառավարության իրավաբանական վարչության պետ ներկայանալով` առանձնապես խոշոր չափերի գումարների հափշտակության համար 9 տարի ազատազրկված Արթուր Սարգսյանի գործով վերաքննիչ բողոքը քննվում է համապատասխան ատյանում:
Ամբաստանյալի պաշտպանը գտնում է, որ մեղադրանքը հիմնավոր չէ. «Կատարվածը պարզ քաղաքացիաիրավական հարաբերություններ են, որոնք արհեստականորեն ուռճացվել են ու Վերաքննիչ քրեական դատարանից խնդրում ենք Արթուր Սարգսյանին անպարտ ճանաչել»,- նշեց փաստաբան Հունան Բաբայանը:
Վերջին նիստը ընդմիջվել է դատարանի ծանրաբեռնվածության պատճառով: Պարոն Բաբայանը փոխանցեց, որ բողոքի քննությունը կշարունակվի հաջորդ դատական նիստին:
Նշենք, որ դատախազը միջնորդել է Արթուր Սարգսյանին դատապարտել 11 տարվա ազատազրկման` հօգուտ տուժողների բռնագանձելով մոտ 190 մլն դրամ:
Հիշեցնենք՝ Արթուր Սարգսյանին մեղադրանք է առաջադրվել այն բանի համար, որ նա ներկայանալով որպես պաշտոնատար անձ, իսկ առանձին դեպքերում` որպես արտերկրում եկամտաբեր ձեռնարկատիրական գործունեությամբ զբաղվող անձնավորություն, 2008թ. սեպտեմբեր ամսից մինչև 2012թ. մարտ ամիսը, ներառյալ` ժամանակահատվածում, տարբեր ֆիզիկական և իրավաբանական անձանց հետ գործարքներ կատարելու պատրվակով, խարդախությամբ` խաբեության կամ վստահությունը չարաշահելու եղանակով, ներքոհիշյալ դրվագներով կատարել է առանձնապես խոշոր չափերով ուրիշի գույքի հափշտակություններ:
